Reverse
Column 3
1. [...] nu [...]
2. [...] n(u)=as=kan [...]
3. [...] kuēs ITTI LUGAL KUR URUArzawa [...]
4. aruni parranda pāntes esir. N(u)=as IŠTU GIŠGIGIR U IŠTU NAM.RA-as
5. x NAM.RA esta. N(u)=an=kan [...]
6. URUHattusi parā nehhun, n(u)=an arha uwater [...]
7. IŠTU GIŠGIGIR U IŠTU NAM.RA.MEŠ
8. x NAM.RA esta [...]
9. N(u)=an=kan URUHattusi parā nehhun, n(u)=an arha uwater [...]
10. Namma arunas arha appa uwanun, nu=kan INA ŠÀ ÍDSēha
11. kuis NAM.RA anda esta mānan zahhiyanun. Nu=mu=[...]
12. Manapa-Dattas istamasta : "LUGAL KUR Hatti=wa uizzi",
13. nu=kan nahsariyattat. N(u)=as=mu namma menahhanda
14. UL uit, nu=mu=kan AMA-ŠU LÚ.MEŠ.ŠU.GI ŠU.GI=ya
15. menahhanda parā naista. N(u)=at=mu uer, GÌR.MEŠ-as kattan
16. hālier. Nu=mu MUNUS.MEŠ kuit GÌR.MEŠ-as kattan hālier
17. nu ANA MUNUS.MEŠ handa kāri tiyanun. Nu namma INA ÍDSēha
18. UL pāun. Nu=kan NAM.RA Hattusi kuis INA ÍDSēha
19. anda esta n(u)=an=mu parā pier. Nu=mu NAM.RA kuin
20. parā pier n(u)=as 4000 NAM.RA esta. N(u)=an=kan URUHattusi
21. parā nehhun, n(u)=an arha uwater. Manapa-Dattan=ma=za
22. KUR ÍDSēha=ya ÌR-anni dahhun.
──────────────────
23. Namma INA KUR URUMirā pāun. Nu KUR URUMirā ANA Mashu-iluwa ADDIN,
24. KUR ÍDSēha=ma ANA Manapa-Datta ADDIN, KUR URUHapalla=ma ANA Targas-nalli
25. ADDIN. Nu=za=kan kē KUR.KUR.MEŠ pēdi=ssi ÌR-nahhun.
26. Nu-smas-kan ERIN2.MEŠ ishihhun, nu=mu ERIN2.MEŠ piskiwan dāir.
27. Nu=kan INA ŠÀ KUR URUArzawa kuit gimmantariyanun INA MU.2.KAM=ma=mu
28. dUTU URUArinna GAŠAN-YA Tarhus NIR.GÁL EN=YA Mezzullas DINGIR.MEŠ=ya
29. hūmantes piran huēr, nu=za KUR URUArzawa tarhun.
30. Nu-za kuit URUHattusi arha udahhun kuit=ma=za=kan pēdi=ssi
31. ÌR-nahhun. Nu=smas=kan ERIN2.MEŠ ishihhun, nu=mu ERIN2.MEŠ peskiwan
32. dāir. Nu=za KUR URUArzawa kuit hūman tarhun, nu=za dUTU-ŠI kuin
33. NAM.RA INA É LUGAL uwatenun, n(u)=as anda 1-etta 66000 NAM.RA
34. esta. URUHattusas=ma=za EN.MEŠ ERIN2.MEŠ ANŠU.KUR.RA.MEŠ=ya kuin NAM.RA GUD UDU=ya
35. uwatet nu=san kappuwāwar NU.GÁL esta.
36. Nu=za mahhan KUR URUArzawa hūman tarhun,
37. namma URUHattusi arha uwanun. Nu=kan INA KUR URUArzawa kuit
38. anda gemmandariyanun, nu kī INA MU.2.KAM iyanun.
──────────────────
39. Wetantanni=ma INA ḪUR.SAGAsharpaya pāun. Nu=za ḪUR.SAGAsharpayan kuis
40. URUGasgas esan harta, nu ŠA KUR URUPalā KASKAL.MEŠ karsan harta.
41. Nu uni ŠA ḪUR.SAGAsharpaya URUGasgan zahhiyanun. Nu=mu dUTU URUArinna GAŠAN=YA
42. Tarhus NIR.GÁL BĒLI=YA Mezzullas DINGIR.MEŠ=ya hūmantes piran
43. huēr. Nu=za ḪUR.SAGAsharpayan kuis URUGasgas esan harta
44. n(u)=an=za=an tarhun, n(u)=an=kan kuenun. ḪUR.SAGAsharpayan=ma dannattahhun.
45. Namma arha uwanun. Nu mahhan INA URUSammaha arhun,
46. nu INA URUZiulila andan uwanun.
──────────────────
47. Nu kuitman ABU=YA INA KUR URUMittanni esta, nu LÚPAP URUArauwannas
48. kuis KUR URUKissiya walhanneskit n(u)=at mekki tamassan
49. harta. Nu dUTU-ŠI INA KUR URUArauwanna pāun. Nu KUR URUArauwanna
50. walhun. Nu=mu dUTU URUArinna GAŠAN-YA Tarhus NIR.GÁL BĒLI=YA Mezzullas
51. DINGIR.MEŠ=ya hūmantes piran huēr. Nu=za KUR URUArauwanna hūman tarhun.
52. Nu=za IŠTU KUR URUArauwanna kuin NAM.RA.MEŠ INA É LUGAL uwatenun,
53. n(u)=as 3500 NAM.RA esta. URUHattusas=ma=za EN.MEŠ ERIN2.MEŠ ANŠU.KUR.RA.MEŠ=ya
54. kuin NAM.RA.MEŠ GUD UDU uwatet, nu=kan kappuwāwar NU.GÁL esta.
55. Nu=za mahhan KUR URUArauwanna tarhun, namma appa Hattusi
56. uwanun. Nu INA MU.1.KAM kī iyanun.
──────────────────
57. Wetantanni=ma INA KUR URUZiharriya pāun. Nu=za ANA PĀNI ABI=YA
58. kuis URUGasgas ḪUR.SAGTarikarimun ŠU.DIM4-az esat
59. namma=as=za URUHattusi hargas kisat. Nu uer URUHattusan walhir.
60. N(u)=an mekki dammeshāir. Nu dUTU-ŠI pāun. Nu=za ḪUR.SAGTarikarimun
61. kuit URUGasgas esan harta, n(u)=an walhun. Nu=mu dUTU URUArinna
62. GAŠAN-YA Tarhus NIR.GÁL BĒLI=YA Mezzullas DINGIR.MEŠ=ya hūmantes
63. piran huēr. Nu=za ŠA ḪUR.SAGTarikarimu URUGasgan
64. tarhun, n(u)=an=kan kuenun. ḪUR.SAGTarikarimun=ma
65. dannattahhun. KUR URUZiharriya hūman arha warnunun.
66. Namma appa URUHattusi uwanun. Nu kī INA MU.1.KAM iyanun.
──────────────────
67. Wetantanni=ma INA KUR URUTipiya pāun. Nu kuitman ABU=YA
68. INA KUR Mittanni esta, Pihhuniyas=ma LÚ URUTipiya iyattat.
69. Nu KUR UGU walhanneskit, n(u)=as parā INA URUZazzisa
70. arskit. Nu KUR UGU sarā dās, n(u)=at=kan INA KUR Gasga
71. kattanda pēdas. KUR URUIstitina=ma=za hūman dās,
72. n(u)=at=za apēl wisiyawas pēdan iyat.
──────────────────
73. Namma Pihhuniyas UL ŠA URUGasga iwar taparta.
74. Hūdāk mahhan INA URUGasga UL ŠA 1-EN tapariyas
75. esta. Asi-ma Pihhuniyas ŠA LUGAL-UTTIM iwar
76. taparta. Nu=si dUTU-ŠI pāun nu=si LÚṬĒMA uiyanun
77. nu=si hatrānun : "ÌR.MEŠ=YA=wa=za kuēs dās nu=war=as=kan INA URUGasga
78. kattanta pehutet. Nu=war=as=mu arha uppi."
79. Pihhuniyas=ma=mu appa kissan hatrāes :
80. "UL=wa=ta kuitki appa pihhi. Mān=a=wa=mu zahhiya
81. uwasi, nu=wa=ta UL kuwatqa ammēl A.ŠÀ kueri anda
82. zahhiya tiyami. ANA KUR-TI=KA=wa=ta menahhanda uwami.
83. Nu=wa=ta=kan ANA ŠÀ KUR=KA zahhiya tiyami." Nu=mu mahhan
84. Pihhuniyas enissan appa IŠPUR, nu=mu ÌR.MEŠ=YA
85. appa UL pista. Nu=si zahhiya pāun. Nu=si KUR-SU
86. walhun. Nu=mu dUTU URUArinna GAŠAN-YA Tarhus NIR.GÁL BĒLI=YA Mezzullas
87. DINGIR.MEŠ=ya hūmantes piran huēr. Nu=za KUR URUTipiya
88. hūman tarhun, n(u)=at arha warnunun.
89. Pihhuniyan=a AṢBAT, n(u)=an URUHattusi arha uwatenun.
90. Namma IŠTU KUR URUTipiya appa uwanun. Nu=za Pihhuniyas kuit
91. KUR URUIstitina tān harta, n(u)=at appa wetenun.
92. N(u)=at appa ŠA KUR URUHatti utne iyanun.
──────────────────
93. Namma=za mahhan KUR URUTipiya tarhun, nu ANA Anniya LUGAL URUAzzi
94. LÚṬĒMA uiyanun. Nu=si hatrānun : "kuitman=wa ABU=YA
95. INA KUR URUMittanni esta, nu=wa=ta=kan ÌR.MEŠ=YA kuēs anda uer.