gur-ša-u-wa-na-an-za pa-it na-aš-kán a-pí-ia an-da e-eš-taObverse
Column 2
1. nam-ma [pa-r]a-a I-NA URUiš-ḫu-pí-it-ta pa-a-un nu URU⌈pal-ḫu-iš-ša⌉-[an]
2. GUL-un nu-mu-uš-ša-an I-NA URUpal-ḫu-iš-ša EGIR-an ⌈LÚKÚR URUpé-eš⌉-ḫu-ru-uš
3. MÈ-ia ti-ia-at na-an za-aḫ-ḫi-ia-nu-un nu-mu dUTU URUa-ri-in-na GAŠAN-IA
4. dU NIR.GÁL BE-LÍ-IA dme-ez-zu-ul-la-aš DINGIR.MEŠ-ia? ḫu-u-ma-an-te-eš pí-ra-an ḫu-i-e-er
5. nu-kán LÚKÚR pí-iš-ḫu-ru-un I-NA URUpal-ḫu-iš-ša EGIR-an ku-e-nu-un
6. nam-ma URU-an ar-ḫa wa-ar-nu-nu-un
Single rule.
7. nam-ma URUpal-ḫu-iš-ša-az EGIR-pa I-NA URUKUG.BABBAR-ti ú-wa-nu-un
8. nu-za ERIN2.MEŠ ANŠU.KUR.RA.MEŠ ni-ni-in-ku-un nam-ma a-pé-e-da-ni MU-ti i-na KUR ar-za-u-wa
9. i-ia-an-ni-ia-nu-un-pat A-NA mu-uḫ-ḫa-LÚ-ma LÚṬE4-MA u-i-ia-nu-un
10. nu-uš-ši ḫa-at-ra-a-nu-un ÌR.MEŠ-IA-wa-at-tak-kán ku-i-e-eš an-da ú-e-er
11. nu-wa-ra-aš-ta EGIR-pa ku-it ú-e-wa-ak-ki-nu-un nu-wa-ra-aš-mu EGIR-pa
12. EGIR-pa Ú-UL pa-iš-ta nu-wa-mu-za TUR-la-an ḫal-ze-eš-še-eš-ta
13. nu-wa-mu-za te-ep-nu-uš-ki-it ki-nu-na-wa e-ḫu nu-wa za-aḫ-ḫi-ia-u-wa-aš-ta-ti
14. nu-wa-an-na-aš dU BE-LÍ-IA DI-NAM ḫa-an-na-a-ú
Single rule.
15. ma-aḫ-ḫa-an-ma i-ia-aḫ-ḫa-at nu GIM-an I-NA ḪUR.SAGla-wa-ša a-ar-ḫu-un
16. nu-za dU NIR.GÁL EN-IA pa-ra-a ḫa-an-da-an-da-a-tar te-ek-ku-uš-ša-nu-ut
17. nu GIŠkal-mi-ša-na-an ši-ia-a-it nu GIŠkal-mi-ša-na-an am-me-el KARAŠ.ḪI.A-IA
18. uš-ki-it KUR URUar-za-u-wa-ia-an uš-ki-it nu GIŠkal-mi-ša-na-aš pa-it
19. nu KUR URUar-za-u-wa GUL-aḫ-ta ŠA mu-uḫ-ḫa-LÚ-ia URUa-pa-a-ša-an URU-an GUL-aḫ-ta
20. mu-uḫ-ḫa-LÚ-na ge-nu-uš-šu-uš a-še-eš-ta na-aš ir-ma-li-ia-at-ta-at
21. nu ma-aḫ-ḫa-an mu-uḫ-ḫa-LÚ-iš GIG-at na-aš-mu nam-ma za-aḫ-ḫi-ia
22. me-na-aḫ-ḫa-an-da Ú-UL ú-it nu-mu-kán <<nu-mu-kán>> mSUM.MA.dKAL-an DUMU-ŠU
23. QA-DU ERIN2.MEŠ ANŠU.KUR.RA.MEŠ me-na-aḫ-ḫa-an-da pa-ra-a na-eš-ta
24. na-aš-mu I-NA ÍDa-aš-tar-pa I-NA URUwa-al-ma-a MÈ-ia ti-ia-at
25. na-an dUTU-ŠI za-aḫ-ḫi-ia-nu-un nu-mu dUTU URUa-ri-in-na GAŠAN-IA
26. dU NIR.GÁL BE-LÍ-IA dme-ez-zu-ul-la-aš DINGIR.MEŠ-ia? ḫu-u-ma-an-te-eš pí-ra-an ḫu-i-e-er
27. nu-za mSUM.MA.dKAL-an ⌈DUMU⌉ m⌈u-uḫ-ḫa⌉-LÚ QA-DU ERIN2.MEŠ-ŠU ANŠU.KUR.RA.MEŠ-ŠU tar-aḫ-ḫu-un
28. ⌈na⌉-an-kán ku-e-nu-un nam-ma-⌈an EGIR-an⌉-pat AṢ-BAT nu-kán KUR URUar-za-u-wa
29. ⌈par⌉-ra-an-da pa-a-un nu I-NA URUa-pa-a-ša A-NA URU-LIM
30. ŠA mu-uḫ-ḫa-LÚ an-da-an pa-a-un nu-mu muḫ-ḫa-LÚ-iš Ú-UL ma-az-za-aš-ta
31. na-aš-mu-kán ḫu-u-wa-iš na-aš-kán a-ru-ni par-ra-an-da
32. gur-ša-u-wa-na-an-za pa-it na-aš-kán a-pí-ia an-da e-eš-ta
Single rule.
33. KUR URUar-za-u-wa-ma-kán ḫu-u-ma-an par-aš-ta nu ku-i-e-eš NAM.RA I-NA ḪUR.SAGa-ri-in-na-an-da
34. pa-a-ir nu-za-kán ḪUR.SAGa-ri-in-na-an-da-an e-ep-pir ku-i-e-eš-ma NAM.RA.MEŠ
35. pa-ra-a I-NA URUpu-ú-ra-an-da pa-a-ir nu-za-kán <<nu-za-kán>> URUpu-ra-an-da-an e-ep-pir
36. ku-i-e-eš-ma-kán NAM.RA.MEŠ a-ru-ni par-ra-an-da IT-TI mu-uḫ-ḫa-LÚ pa-a-ir
37. ⌈nu⌉ dUTU-ŠI I-NA ḪUR.SAGa-ri-in-na-an-da A-NA NAM.RA EGIR-an-da pa-a-un
38. nu ḪUR.SAGa-ri-in-na-an-da-an za-aḫ-ḫi-ia-nu-un nu-mu dUTU TÚL-na GAŠAN-IA [...-ir]
39. dUTU NIR.GÁL BE-LÍ-IA dme-ez-zu-ul-la-aš DINGIR.MEŠ-ia ḫu-u-ma-an-te-eš pí-ra-an
40. ḫu-u-i-e-er nu-za ḪUR.SAGa-ri-in-na-an-da-an tar-aḫ-ḫu-un
41. nu-za dUTU-ŠI ku-in NAM.RA I-NA É LUGAL ú-wa-te-nu-un
42. na-aš 1-10000 5-LI-IM 5-ME NAM.RA e-eš-ta URUKUG.BABBAR-aš-ma-za EN.MEŠ ERIN2.MEŠ ANŠU.KUR.RA.MEŠ-ia
43. ku-in NAM.RA.MEŠ ú-wa-te-et nu-uš-ša-an kap-pu-u-wa-u-wa-ar
44. NU.GÁL e-eš-ta nam-ma-kán NAM.RA.MEŠ dUTU-ŠI pa-ra-a
45. ne-eḫ-ḫu-un na-an ar-ḫa ú-wa-te-er
Single rule.
46. nu-za ma-aḫ-ḫa-an ḪUR.SAGa-ri-in-na-an-da-an tar-aḫ-ḫu-un
47. nam-ma EGIR-pa I-NA ÍDa-aš-tar-pa ú-wa-nu-un nu-za BÀD KARAŠ
48. I-NA ÍDaš-tar-pa wa-aḫ-nu-nu-un nu-za EZEN MU-ti a-pí-ia i-ia-nu-un
49. nu ki-i I-NA MU.1.KAM i-ia-nu-un
Single rule.
50. ⌈ma-aḫ-ḫa⌉-an-ma ḫa-me-eš-ḫa-an-za ki-ša-at nu mu-uḫ-ḫa-LÚ-iš ku-it GIG-at
51. ⌈na-aš-kán⌉ a-ru-ni an-da e-eš-ta DUMU.MEŠ-ŠU-NU-ia-aš-ši kat-ta-an e-šir
52. nu-kán mu-uḫ-ḫa-LÚ-iš a-ru-ni an-da BA.UG7 DUMU.MEŠ-ŠU-NU-ma-za ar-ḫa
53. šar-ra-an-da-at nu-kán 1-aš ŠÀ A.AB.BA-pat e-eš-ta 1-aš-ma-kán
54. m⌈ta-pa-la-zu⌉-na-ú-li-iš a-ru-na-az ar-ḫa ú-it nu-kán KUR URUar-za-u-wa ku-it ḫu-u-ma-an
55. [...] I-NA URUpu-ra-an-da ša-ra-a pa-a-an-<za> e-eš-ta
56. nu-[za? mta?-pa-l]a-zu-na-wa-liš I-NA URUpu-ra-an-da ša-ra-a pa-it
Single rule.
57. [nu dUTU-ŠI ERIN2.MEŠ URUḫa-at]-ti kar-ap-pu-un nu I-NA URUpu-ra-an-⌈da⌉ MÈ-ia pa-a-un
58. [nu-kán mta-pa-la-zu-na-w]a-liš IŠ-TU ERIN2.MEŠ ANŠU.KUR.RA.MEŠ URUpu-ra-an-da-za kat-ta ú-it
59. [na-aš-m]u za-aḫ-ḫi-ia me-⌈na-aḫ-ḫa-an⌉-da ú-it na-aš-mu-kán A-NA A.ŠÀ A.KÀR-ŠU
60. [an-da] MÈ-ia ti-ia-at na-an dUTU-ŠI MÈ-ia-nu-nu-un
61. [nu-mu d]UTU URUa-ri-in-na ⌈GAŠAN-IA⌉ dU NIR.GÁL BE-LÍ-IA
62. [dme-ez-zu-u]l-la-aš DINGIR.MEŠ-ia ḫu-u-[ma-an-t]e-eš pí-ra-an ḫu-u-i-e-er nu-za mda-pa-la-zu-na-ú-wa-li-in
63. [... QA-DU] ERIN2.MEŠ-ŠU ANŠU.KUR.RA.MEŠ-ŠU tar-aḫ-ḫu-un na-an-kán ku-e-nu-un
64. [nam-ma-an EGIR]-an AṢ-BAT nu pa-a-un URUpu-ra-an-da-an an-da wa-aḫ-nu-nu-un
65. [na-an-kán an-da] ḫa-at-ke-eš-nu-nu-un nu-uš-ši-kán ú-i-⌈ta-a-ar⌉ ar-ḫa da-aḫ-ḫu-un
Single rule.
66. [nu ku-it-ma-an URUp]u-ra-an-da-an an-da ḫa-at-ke-eš-nu-nu-un
67. [nu-kán mda-pa-la-zu-na]-ú-liš ku-iš DUMU mu-uḫ-ḫa-LÚ I-NA URUpu-ra-an-da še-er e-eš-ta
68. [na-aḫ-šar-ri-ia-a]t-ta-at na-aš-kán URUpu-ra-an-da-za MI-az kat-ta ḫu-wa-iš
69. [nu-uš-ša-an DUMU.MEŠ ŠA NA]M.RA.MEŠ-ia ša-ra-am-na-az pí-ra-an ḫu-u-i-nu-ut
70. [na-an-kán URUpu-ra-an-da]-za kat-ta pé-e-ḫu-te-et
Single rule.
71. [ma-aḫ-ḫa-an-ma dUTU-ŠI iš-t]a-ma-aš-šu-un URUda-pa-la-zu-na-ú-liš-wa-kán
72. [MI-az kat-ta ḫu-wa-iš an?-da?]-wa-za DUMU.MEŠ-ŠU NAM.RA.MEŠ-ia
73. [ša-ra-am-na-az pí-ra-an ḫ]u-i-nu-ut nu-wa-ra-an-kán kat-ta pé-e-ḫu-te-et
74. [nu-uš-ši dUTU-ŠI ERIN2.MEŠ ANŠU.KUR.R]A.MEŠ EGIR-an-da u-i-ia-nu-un
75. [na-at-ši ... in] KAS-ši EGIR-an-da ta-ma-aš-šir
76. [nu-uš-ši-iš-ša-an DUMU.MEŠ-ŠU NA]M.RA.MEŠ-ia ar-ḫa da-a-ir na-an EGIR-pa
77. [e-ep-pir? mda-pa-la-zu-na-ú-wa-liš-ma?] 1-aš SAG.DU-aš iš-par-za-aš-ta
78. [...] na-an-za-an ERIN2.MEŠ-pat ANŠU.KUR.RA.MEŠ da-a-aš
Single rule.
79. [... URUpu-ra]-an-da-an an-da ḫa-at-ké-[eš-nu-nu-un]
80. [... za-aḫ-ḫi-ia-nu]-un [nu-mu DINGIR.MEŠ]
81. [nu-mu dUTU URUTÚL!-na GAŠAN-IA dU NIR.GÁL EN!-ia] dme-ez-zu-ul-la-⌈aš⌉
82. [DINGIR.MEŠ-ia ḫu-u-ma-an-te-eš pí-ra-an ḫu-u-i-e-er nu]-za URUpu-ra-an-da-an [tar-aḫ-ḫu-un]
83. [nu-za ku-in NAM.RA I-NA É LUGAL ú-wa-te-nu-un n]a-aš 1-10000 6-LI-I[M X-ME]
84. [NAM.RA e-eš-ta URUKUG.BABBAR-aš-ma-za EN.MEŠ ERIN2.MEŠ ANŠU.KUR.RA.MEŠ]-ia ku-in [NAM.RA.MEŠ]
85. [ú-wa-te-et nu-uš-ša-an kap-pu-u-wa-u-wa-ar NU.GÁL] e-[eš-ta]
86. [nam-ma-kán NAM.RA.MEŠ URUKUG.BABBAR-ši pa-ra-a ne-eḫ-ḫu-un na-an ar-ḫa ú-wa-te-er]